The Struggle of a Butterfly - तितली का संघर्ष

The Struggle of a Butterfly - तितली का संघर्ष 

ek baar ek aadmi ko apne garden mein tahalate hue kisi tahani se latakta hua ek titali ka kokoon dikhai pada. ab har roz wo aadmi use dekhane laga , aur ek din usne notice kiya ki us kokoon mein ek chhota sa chhed ban gaya hai. us din wo vahin baith gaya aur ghanto use dekhta raha. usne dekha ki titali us khol se baahar nikalne ki bahut koshish kar rahi hai , par bahut der tak prayaas karne ke baad bhi wo us chhed se nahin nikal paayi, aur phir wo bilakul shaant ho gayi maano usne haar maan li ho. 

isliye us aadmi ne nishchay kiya ki wo us titali ki madad karega. usne ek kainchi uthaayi aur kokoon ki opening ko itana bada kar diya ki wo titali aasaani se baahar nikal sake, aur yahi hua. titali bina kisi aur sangharsh ke aasaani se baahar nikal aai, par usaka sharir sooja hua tha, aur pankh sookhe hue the. 

wo aadmi titali ko ye soch kar dekhta raha ki wo kisi bhi waqt apne pankh phaila kar udne lagegi, par aisa kuchh bhi nahin hua. iske ulat bechaari titali kabhi ud hi nahin payi aur use apani baaki ki zindagi idhar-udhar ghisat te hue bitaani padi. 

wo aadmi apani daya aur jaldabaaji mein ye nahin samajh paaya ki dar asal kokoon se nikalne ki prakriya ko prakrti ne itna kathin isliye banaaya hai taaki aisa karane se titali ke sharir mein maujood taral uske pankhon mein pahuch sake aur wo chhed se baahar nikalte hi ud sake. 

vaastav mein kabhi-kabhi humaare jeevan mein sangharsh hi wo cheez hoti jiski hume sachmuch aavashyakta hoti hai. yadi hum bina kisi struggle  ke sab kuchh paane lage to hum bhi ek apang ke saamaan ho jaayenge. bina parishram aur sangharsh ke hum kabhi utne majboot nahin ban sakte jitana hamaari kshamta hai. isliye jeevan mein aane vaale kathin palon ko sakaratmak drshtikon se dekhiye wo aapko kuchh aisa seekha jaayange jo aapki zindagi ki udaan ko possible bana paayenge.