छत्रपति शिवाजी के जीवन के प्रेरणादायक प्रसंग - MOTIVATIONAL INCIDENCE OF CHATRAPATI SHIVAJI MAHARAJ
19th Feb ko shivaji jayanti hoti hai. Is shubh avsar par main aapke saath unke jeevan ke teen prernadayak prasang saajha kar raha hu. aaiye hum bharat varsh ke is veer sapoot ko naman karein aur unke jeevan se shiksha le, bharat maata ki seva mein agrasar ho.
shivaji ke samaksh ek baar unke sainik kisi gaav ke mukhiya ko pakad kar le laaye. mukhiya badi-ghani moochon wala bada hi rasookhdaar vyakti tha, par aaj uspar ek vidhwa
ki ijjat lootne ka aarop saabit ho chuka tha. us samay shivaaji maatra 14 varsh ke the, par waha bade hi bahadur, nidar aur nyaaya priya the aur visheshkar mahilaon ke prati unke mann mein asim sammaan tha. unhone tatkaal apna nirnaya suna diya , ” iske dono haath , aur pair kaat do , aise jaghanya aparaadh ke liye isse kam koi saja nahi ho sakti.” shivaji jeevan paryant sahasik kaarya karte rahe aur garib, besahara logo ko humesha prem aur sammaan dete rahe.
shivaaji ke saahas ka ek aur kissa prasiddha hai. tab pune ke kareeb nachani gaav mein ek bhayaanak cheeteh ka aatank chaaya hua tha. Waha achanak hi kahi se hamla karta tha aur jungal mein ojhal ho jaata.. dare hue gaav wale apni samsya lekar shivaji ke paas pahunche. ”hume us bhayaanak cheeteh se bachaiye . Waha na jaane kitne bachchon ko maar chuka hai. jyaadatar waha tab humla karta hai jab hum sab so rahe hote hain.” shivaji ne dhairyapoorvak graamino ko suna, “aap log chinta mat kariye, main yahan aapki madad karne ke liye hi hu.” shivaaji apne sipaahiyon yasaji aur kuch sainikon ke saath jungal mein cheeteh ko maarne ke liye nikal pade. bahut dhoondhane ke baad jaise hi waha saamne aaya, sainik dar kar pichhe hat gae, par shivaaji aur yasaji bina dare uspar toot pade aur palak jhapak te hi use maar giraaya. gaav wale khush ho gaye aur “jai shivaji ” ke naare lagaane lage.
shivaji ke pita ka naam shahaji tha. waha aksar yudh ladne ke liye ghar se door rahte the. isaliye unhe shivaji ke nidar aur parakrami hone ka adhik gyaan nahi tha. kisi avsar par waha shivaji ko bijapur ke sultan ke darbaar mein le gaye. shaahaji ne teen baar jhukkar sultan ko salam kiya, aur shivaji se bhi aisa hi karne ko kaha. lekin shivaji apna sar upar uthaaye sidhe khade rahe. videshi shaasak ke saamne waha kisi bhi keemat par sar jhukane ko taiyaar nahi hue, aur sher ki tarah shaan se chalate hue darabaar se vaapas chale gae.
Post a Comment
if you have any doubts, please let me know